Lajme

Në media u raportua se Vjosa Osmani ishte te Kurti para shkarkimit të Veliut, flet kryetarja e Kuvendit

03/18/2020 15:22
nga:Gazeta Blic

Kryetarja e Kuvendit, Vjosa Osmani ka folur për Gazeta Blic pas raportimeve në media se ajo ishte në takim me kryeministrin Albin Kurti para shkarkimit të ministrit të Punëve të Brendshme, Agim Veliu.

Ajo e ka mohuar një gjë të tillë duke thënë se është një gënjeshtër e kulluar.

“Është një gënjeshtër e kulluar”, tha ajo shkurt për Gazeta Blic.

Ndryshe, Albin Kurti sot e shkarkoi Veliun, me arsyetimin se shkaktoi panik me deklaratat e tij për koronavirusin.

Njoftimi i plotë i Kurtit:

Mbrëmë vonë, pas mesnate, Ministri i Punëve të Brendshme dhe Administratës Publike, z. Agim Veliu, për televizionin Klan Kosova, u deklarua kundër qëndrimit të Kryeministrit të Republikës së Kosovës mbi shpalljen e gjendjes së jashtëzakonshme. Ai, gjithashtu, në këtë deklarim, përhapë panik duke thënë se “numri i të prekurve po rritet prej ore në orë”. As Ministria e Shëndetësisë e as Instituti Kombëtar i Shëndetësisë Publike nuk thanë që numri i të infektuarve me COVID-19 po rritet nga ora në orë. Në këto momente, kur e gjithë administrata publike po bën përpjekje maksimale për të minimizuar dëmet nga virusi Korona, udhëheqësit e institucioneve qendrore, përfshirë këtu anëtarët e kabinetit qeveritar duhet të demonstrojnë maturi si në vendime ashtu edhe deklarime.

Përmes deklaratave të tij të bëra publikisht, por jo edhe të mbështetura me qëndrime të tij në mbledhje të brendshme, Ministri i Punëve të Brendshme dhe Administratës Publike, z. Veliu ka dëshmuar mungesë të theksuar lidershipi dhe ka minuar hapur punën e qeverisë, pjesë e të cilës ai është.

Në këto rrethana jam i detyruar të veproj, andaj edhe kam vendosur të shkarkoj z. Veliu nga detyra e Ministrit të Ministrisë së Punëve të Brendshme dhe Administratës Publike. Unë kam njoftuar Kryetarin e LDK-së, z. Isa Mustafa, për vendimin që kam marrë dhe po ashtu kam kërkuar prej tij që sa më shpejtë të ma dërgojë emrin e ministrit të ri.

Ndërkohë, deri në zgjedhjen e ministrit të ri, të gjitha vendimet brenda Ministrisë së Punëve të Brendshme dhe Administratës Publike do të merren nga zv. Ministri aktual, z. Xhelal Sveçla.

Isa Mustafa- Albin Kurtit: Ktheje në detyrë Veliun dhe hiqe taksën, ose po e prishim koalicionin

06/01/2020 13:22

Papërgjegjësia e qeverisë dhe komunave për hapjen e çerdheve, dëmton prindërit!