Gjatë orëve të pasditës është raportuar për dorëheqjen e Vesmira Haradinajt nga pozita që mbante si drejtoreshë e marketingut të Telekomit.

Ndërkaq, GazetaBlic nga burime të sigurta merr vesh se arsyeja ka të bëjë me refuzimin e urdhrave të kryeshefes Burbuqe Hana, e cila i kishte kërkuar një anulim joligjor të kontratave të vitit 2018/2019, përcjell GazetaBlic.

Pra, bashkëshortja e vëllait të ish-kryeministrit Ramush Haradinaj, u largua nga pozita që mbanë për shkak të presionit të kryeshefes.

Avancimet e brendshme në telekom janë kryer nga viti 2003 e së këndjemi, sipas vendimit të Kryeshefit Ekzekutiv. Tani, kryeshefja në kundërshtim me vendimin e bordit ka kërkuar anulimin e kontratave të punës të lidhura më 2018/2019, duke i bërë presion komisionit që t’i anulojë kontratat e punës.

GazetaBlic gjithashtu ka siguruar edhe letrën që Vesmira Haradinaj ia ka dërguar Burbuqe Hanës, ku i kërkohet ndryshimi i pozitës.

“E nderuar,
Ju kërkova dje takim, por në pamundësi të takimit nga ana juaj, ju njoftoj se tërhiqem nga pozita e Drejtoreshës së Marketingut.
Pres nga ju të me ofroni bashkëpunim dhe caktim në pozitë tjetër të punës.
Deri në njoftim nga ana juaj, ju pershendes!”, thuhet ndër të tjera në letrën e saj.

Deri tani nuk ka ndonjë reagim nga zyra ligjore për vendimin e Burbuqe Hana.

/GazetaBlic/