Lajme

LDK “mollë sherri” mes Blerta Deliut dhe Albulena Haxhiut

08/13/2019 19:04
nga:L H

Deputetja e PDK-së, Blerta Deliu i është kundërpërgjigjur homologes së saj nga VV, Albulena Haxhiut e cila tha se në Kosovë janë dy pole në skenën politike, duke shtuar se është në duart e LDK-së të vendos cilit pol do t’i takojë.

Lidhur me këtë, Deliu  ka thënë se Albulena Haxhiu sot e tha një të vërtetë dhe në mënyrën më bukfale të mundshme.

Ka shtuar se është se vërtetë botëkuptimi politik në Kosovë është i ndarë në dy pole; në atë shtetndërtues dhe atë shtetmohues.

“Albulena Haxhiu sot e tha një të vërtetë dhe në mënyrën më bukfale të mundshme. Ajo, ndoshta e para nga Vetëvendosje e zbuloi si e kuptojnë dhe perceptojne relevancën politike në Kosovë! Ajo tha sot se kjo hapësirë politike është e ndarë në dy pole, pra në dy forca relevante politike PDK dhe VV dhe se, sipas saj, të gjitha subjektet tjera politike janë vetëm zgjatim i njërit apo tjetrit pol politik”, ka shkruar Deliu.

“Kështu, Albulena i bëri thirrje publike LDK-së (e cila trumpeton se është faktori kryesor dhe përcaktues politik në Kosovë) të bëhet zgjatim i polit të quajtur Vetëvendosje, duke e konsideruar, LDK si të vetme, të pa relevancë politike. Tekefundit kjo le të mbetet në gjykimin e LDK-së. Ajo që dua të them është se vërtetë botëkuptimi politik në Kosovë është i ndarë në dy pole; në atë shtetndërtues dhe atë shtetmohues. Dhe, pajtohem me Albulenën, LDK duhet të vendos cilit botëkuptim i takon. Dhe, po ashtu, sërish pajtohem me Albulenën se ky poli tjetër (shtetndërtues) identifikohet me PDK-në”, ka përfunduar shkrimin e saj deputetja e PDK-së./Gazeta Blic