Kryeministri i Kosovës, Albin Kurti, ka dhënë tetë përgjigje në 8 pyetjet për masat e reja anticovid.

Ai tregoi në detaje se pse po shtrëngohen masat në një kohë kur gjendja epidemiologjike në Kosovë është, siç tha ai, më e mira jo vetëm në rajonin e Ballkanit Perëndimor por edhe në Evropë.

Kurti ka thënë se, gjatë javëve të fundit, rastet e COVID-19 janë rritur jashtëzakonisht shumë në Evropë dhe në Ballkanin Perëndimor dhe se për momentin, rreziku më i madh për një përhapje eventuale të COVID-19 në Kosovë vjen nga udhëtarët prej jashtë vendit.

Dhe së dyti, ai është shprehur se, shfaqja e variantit Omicron, si dhe përhapja e tij në shumë vende evropiane brenda një periudhe të shkurtër, e ka detyruar Qeverinë që të veprojë me shpejtësi dhe vendosmëri në shtrëngimin e masave në kufi.