Lajme

KQZ njofton diasporën: Po qarkullon një aplikacion i paautorizuar, aplikoni për votim përmes mënyrës tonë

01/14/2021 14:13
nga:Sh Xh

Komisioni Qendror i Zgjedhjeve thotë se ka pranuar informacione se sot është publikuar një aplikacion online që po grumbullon të dhënat e qytetarëve jashtë Kosovës dhe donacione.

Ky aplikacion, thotë KQZ është i paautorizuar dhe në kundërshtim me ligjin, përcjellë Gazeta Blic.

Në reagim thuhet se ata që aplikojnë aty nuk janë duek aplikuar në KQZ.

Reagimi i plotë nga KQZ:

Reagim

Prishtinë, 14 janar 2021 – Komisioni Qendror i Zgjedhjeve me shqetësim ka pranuar informacionet se gjatë ditës së sotme është publikuar një aplikacion online i cili po grumbullon të dhënat e qytetarëve nga jashtë Kosovës si dhe donacione.

Komisioni Qendror i Zgjedhjeve njofton të gjithë qytetarët e Republikës së Kosovës, brenda dhe jashtë vendit, se një aplikacion i tillë është i paautorizuar, në kundërshtim me ligjin dhe dëmton integritetin e procesit zgjedhor.

Komisioni Qendror i Zgjedhjeve njofton se të gjithë ata/ato që aplikojnë përmes këtij aplikacioni nuk janë duke paraqitur aplikimin e tyre në KQZ për t’u regjistruar si votues jashtë Kosovës.

KQZ njofton qytetarët me të drejtë vote që jetojnë jashtë Kosovës dhe të cilët plotësojnë kriteret ligjore për t’u regjistruar si votues jashtë Kosovës, që aplikimin e tyre ta bëjnë vetëm përmes mënyrës së përcaktuar nga Komisioni Qendror i Zgjedhjeve, duke ndjekur hapat e publikuar në ueb faqen tonë zyrtare.

Komisioni Qendror i Zgjedhjeve thekson se është i vetmi institucion që ka mandate kushtetues dhe ligjor për të organizuar dhe mbikëqyrur procesin zgjedhor.

Komisioni Qendror i Zgjedhjeve, pas pranimit të informacioneve lidhur me publikimin e këtij aplikacioni, ka njoftuar organet kompetente për të ndërmarrë masat e nevojshme ligjore.