Pakujdesia në trafik dhe manovrimet e qëllimshme nga shoferët kosovarë jo rrallëherë janë përcjellë edhe me incidente të ndryshme. Raste të tilla janë të shpeshta në vendin tonë dhe për pasojë përfundojnë në Polici, raporton Gazeta Sinjali.

Kështu ka ndodhur edhe sot në rrugën “Brigada 123” në Suharekë, ku janë përfshirë katër persona. Dy prej tyre kanë qenë në një veturë, dy të tjerët në një veturë tjetër me targa të huaja, ku nga distanca janë ngacmuar me njëri-tjetrin.

Sinjali mëson se përveç ngacmimeve, të dy nga të dyshuarit i kanë kërcenuar të dyshuarit e tjerë, të cilëve ua bllokuan rrugën, me ç’rast njëri prej tyre nxorri edhe armën.

Situata aty eskaloi dhe dikush raportoi rastin në Polici, me ç’rast një njësi policore intervenoi në vendin e ngjarjes.

Të dyshuarit janë shoqëruar në stacion policor dhe ndaj tyre me urdhër të Prokurorit të Shtetit janë iniciuar dy raste, për kanosje dhe armëmbajtje pa leje.