Kryeministri Albin Kurti tha se Qeveria e Kosovës sot i ka dhënë të drejtë Agjencionit Kadastral që ta zbatojë vendimin e Gjykatës Kushtetuese të Kosovës për Manastirin e Deçanit.
Për këtë, në një prononcim për Gazeta Blic ka reaguar deputeti nga Partia Demokratike e Kosovës, Xhavit Haliti, ku thotë se ky vendim është shembull që të studiohet nga psikologët dhe psikoanalistët.
“Ky vendim është shembull për ta studiuar psikologët dhe psikoanalistët. Përse po e them, kemi sa vite që jemi bombarduar nga propaganda kurtiste lidhur me kundërshtimin e vendimit të Gjykates Kushtetuese, duke i shpallur “tradhtarë” herë qeverisjet e kaluara, e herë Gjykatën Kushtetuese”, tha ai.
Deputeti tutje thotë se si duket Kurti ka filluar ta kuptojë që bashkëpunimi me BE dhe ShBA, nuk bëhet me deklarata por me veprime konkrete.
“Tani lind pyetja, u bënë të gjithë tradhtarë apo si është puna. Për këtë Albini duhet ta sqarojë popullin, mediat, VV, se çfarë ndodhi. Mendoj që do të duhej të shkonte në njërin prej televizioneve publike dhe t’iu përgjigjej një grupi të gazetarëve lidhur me vendimin e tij. Po më duket që ka filluar ta kuptojë që bjeshka me gjoks nuk shtyhet dhe se bashkëpunimi me BE dhe SHBA,nuk bëhet me deklarata por me veprime konkrete, përmes së cilave interesat shumëpalëshe harmonizohen”, përfundoi Haliti për Gazeta Blic.
