Eric Gordy, ekspert britanik, tha se Kuvendi i Kosovës është në një bllokadë të thellë, ku asnjë parti nuk është në gjendje të formojë shumicën ose një qeveri pakicë.
Gordy për GazetaBlic thekson se shumë parti të mëdha janë të hezituara të shkojnë në zgjedhje të reja, për shkak të frikës se pozita e tyre mund të përkeqësohet.
Ai e cilëson këtë situatë si të papajtueshme për qytetarët, pasi institucionet shtetërore janë të paafta për të vepruar.
“Është plotësisht e qartë që Kuvendi është në një bllokadë dhe asnjë parti nuk do të jetë në gjendje të formojë shumicën, ose të marrë miratimin e partive të tjera për të formuar një qeveri pakicë. Po ashtu, duket e qartë se shumë nga partitë më të mëdha janë të hezitueshme të shkojnë në zgjedhje të reja, sepse kanë frikë se pozita e tyre pas zgjedhjeve mund të jetë më e keqe sesa është tani. Kjo është një situatë e papajtueshme për qytetarët, sepse do të thotë që institucionet shtetërore janë kryesisht të paafta për të vepruar. Por gjithashtu duhet të mbajmë parasysh mundësinë që bllokada mund të jetë një pasqyrë e saktë e opinionit publik, i cili është ndarë në atë masë saqë asnjë opsion politik nuk mund të tërheqë mbështetje shumicë”, thotë Gordy.
Eric Gordy thekson se bllokada politike në Kosovë është pasojë e paaftësisë së aktorëve politikë për të bërë kompromise.
Ai thotë se Albin Kurti nuk është i gatshëm të nënshtruar interesat e tij dhe partitë e tjera janë të paafta të bashkohen për interesin publik.
“Karakteri i vazhdueshëm i bllokadës është një shenjë e paaftësisë së aktorëve politikë për të bërë kompromise. Ky është padyshim rasti për z. Kurti, i cili do të preferonte të mos nënshtronte interesat e tij ndaj qëllimeve të një partneri politik, por është gjithashtu i njëjti rast për partitë e tjera, të cilat janë të paafta të formojnë një front të bashkuar në interes të mirëqenies publike. Një koalicion shumë i gjerë i partive kundër Kurtit mund të jetë shumë i larmishëm për t’u mbajtur. Por një koalicion që përfshin Kurtin dhe një partner që mund të moderonte disa nga pozitat e tij mund të arrihet”, tha tutje ai.
Gordy thotë se, Presidentja Osmani mund të veprojë, por mund ta konsiderojë të dëmshme për interesat e saj. Sipas Gordy, politikanët janë të fokusuar tek strategjitë e tyre dhe nuk shqetësohen për qytetarët.
“Të gjitha partitë po bëjnë kërkesa maksimale dhe duket se janë të gatshme të tolerojnë pasojat. Kurti nuk e ka problem të ketë një mandat teknik sa më gjatë që të jetë e mundur, madje edhe nëse kjo do të thotë se ai nuk do të mund të kalojë ligje. Partitë e opozitës nuk e kanë problem të mos kenë një rol politik konkret nëse kjo do të thotë se mund të ushtrojnë presion mbi qeverinë. Presidentja, zonja Osmani, mund të veprojë, por ndoshta e percepton se nuk mund ta bëjë këtë pa dëmtuar interesat e saj politike. E gjithë kjo është në rregull për llogaritë strategjike që po bëhen nga politikanët. Asnjë nga ata nuk duket se është shqetësuar që qytetarët nuk po shërbehen”, tha Gordy.
“Ka aktorë politikë të tjerë përveç partive që kanë qëllime dhe nevoja që mund të plotësohen vetëm me një Kuvend funksional. Interesat e tyre, dukshëm, janë vënë në një nivel më të ulët se sa vetë-interesat e politikanëve”, përfundoi ai për GazetaBlic.
