Szymon Marciniak ka mohuar të ketë bërë ndonjë koment publik pas gjysmëfinales së Ligës së Kampionëve midis Interit dhe Barcelonës.

Gjyqtari polak u akuzua për kritikimin e lojtarëve të Barcelonës, por ai thotë se nuk dha kurrë një intervistë.

Raportet e së enjtes pretenduan se Marciniak i kishte quajtur reagimet e lojtarëve “qesharake” dhe “budallallëqe”. Citimet u botuan nga media egjiptiane Al-Qahera dhe u shpërndanë gjerësisht në internet.

Marciniak u përgjigj përmes medias polake Przeglad Sportowy Onet: “Deklaratat e publikuara nga mediat egjiptiane dhe spanjolle, të cilat u përhapën në mediat sociale, rezultuan të ishin një gënjeshtër e madhe. Një gjyqtar nuk lejohet të bëjë komente pas ndeshjes për vendimet që ka marrë.”

/GazetaBlic Sport