Lajme

Flet drejtori i Spitalit të Pejës, sqaron mjetin e dyshimtë në oborr

05/16/2018 14:43
nga:Q F

Drejtori i Spitalit Rajonal të Pejës, Skender Dreshaj, tha sot se pas alarmit për një mjet të dyshimtë në oborrin e këtij spitali, me urdhër të Policisë, pacientët në objektin afër mjetit të dyshimtë janë zhvendosur në reparte tjera.

Por Dreshaj tha se ata po marrin shërbimet mjekësore në mënyrë të zakonshme.

“Diku rreth orës 12, punëtorët e spitalit kanë hetuar një mjet të dyshimtë, një qese najloni me përmbajtje brenda. Sipas procedurave, ata e kanë njoftuar Policinë e cila ka ardhur menjëherë në vendin e ngjarjes”, tha Dreshaj.

“Pas një ekspertize, ata kanë vlerësuar se bëhet fjalë për një objekt që megjithatë kërkon vlerësimin apo ekspertizën e deminimit dhe konform procedurave standarde, kanë kërkuar nga ne që ta bëjmë evakuimin e pacientëve në një rreze nga objekti i spitalit, procedurë të cilën ne e kemi kryer”, shtoi ai.

Sipas Dreshajt, sa u përket shërbimeve të spitalit, çdo gjë është brenda procedurave normale, “përveç asaj ngarkesës psikike e cila me siguri e ngarkon edhe stafin edhe personelin”.

“Me kërkesë të Policisë janë ndërprerë vizitat dhe jemi në pritje të njësiteve të deminimit”, tha ai.

“Të gjithë pacientët janë mirë, janë të risistemuar dhe janë nën regjimin e protokollit mjekësor të rregullt. Kjo situatë nuk e pengon personelin në ofrimin e shërbimit mjekësor i cili është ofruar deri më tani”, tha Skender Dreshaj.

Ndryshe Policia e Kosovës ka urdhëruar evakuimin e pacientëve në Spitalin e Pejës, për shkak se dyshohet se në oborr është gjetur një mjet i dyshimtë.

 “Një objekt i dyshimtë në një qese është parë para pak kohe në oborrin e Spitalit, dhe Policia e Kosovës ka urdhëruar evakuimin e pacientëve të Repartit Kirurgjik dhe Pediatrik derisa ekipet profesionale të Policisë të saktësojnë se për çfarë mjeti bëhet fjalë”, njoftohet nga Spitali i Pejës.

Sipas këtij njoftimi vizitat tek pacientët sot janë ndërprerë për shkak të situatës së krijuar.

“Spitali i Përgjithshëm në Pejë njofton se askush nuk ka nevojë të shqetësohet për pacientët ngase ata po trajtohen dhe janë marrë masa që kujdesi ndaj tyre të bëhet edhe pas evakuimit”, thuhet në njoftim.

 

08/19/2018 11:29

52 aksidente brenda një dite në Kosovë