Lajme

Demhasaj: Presidenti nuk ka të drejtë të caktojë afate për subjektin fitues të zgjedhjeve

01/13/2020 21:37
nga:B. D

Drejtori i Organizatës “Çohu”, Arton Demhasaj ka komentuar letërkëmbimet mes Vetëvendosjes dhe presidentit Hashim Thaçi për nominimin e kandidatit për kryeministër.

Demhasaj në RTV Dukagjini ka thënë se Presidenti ka të drejtë të caktojë mandatarin për formimin e qeverisë por sipas tij nuk i takon atij të komentojë normat kushtetuese.

“Për komentimin e  normave kushtetuese është Gjykata Kushtetuese e jo Presidenti. Një situatë e tillë nuk është përsëritur herëve të tjera. Në vitin 2017 kur PAN fitoi zgjedhjet por nuk i kishte numrat për të ndërtuar qeverinë, Presidenti priti rreth pesë muaj që të bindet AKR-ja për të kaluar te PAN-i”, tha ai.

Drejtori i “Çohu” thotë se Presidenti nuk ka të drejtë të caktojë afate se çfarë kohe i duhet partisë fituese për të formuar institucionet.

“Edhe ish-kryetari i Kushtetueses, Enver Hasani në këtë studio e ka sqaruar se situata mund të mbetet e bllokuar pafundësisht për faktin se nuk kemi një afat kushtetues që i caktohet partisë fituese për të dhënë nominimin e kandidatit për kryeministër”.

Demhasaj ka thënë se Kurti nuk ka obligim t’i përgjigjet Thaçit përderisa Kushtetuta nuk parasheh afate të tilla.

“Në të kaluarën Presidenti nuk ka bërë presione të tilla ndaj fituesve të zgjedhjeve”, tha ndër të tjera Arton Demhasaj.

08/06/2020 13:37

Demhasaj: Ekziston mundësia që AAK-ja, NISMA e PDK-ja ta votojnë mocionin për rrëzimin e Hotit!