David Philips, i cili drejton Institutin për Paqen në Universitetin e Columbias i ka dalë krahë deklaratës së fundit të kryeministrit Kurti ku theksoi se, nuk pajtohet për çdo gjë me Amerikën.
Philips i tha Gazetës Blic se, Kosova është e pavarur dhe pa marrë parasysh presionin që i vjen nga ShBA-të, qytetarët kanë të drejtën e tyre për vetëvendosje.
“Kosova është një vend sovran dhe i pavarur, qytetarët e së cilës mund të ushtrojnë të drejtën e tyre për vetëvendosje, pa marrë parasysh presionin e SHBA-së”, tha Philips.
Tutje, Philips shton se Kosova duhet të veprojë në interesin e saj kombëtar edhe nëse Shtetet e Bashkuara të Amerikës nuk e miratojnë një vendim të caktuar të Qeverisë.
“Është një shenjë pjekurie politike për Kosovën që të qëndrojë në këmbët e veta dhe të veprojë në interesin e saj kombëtar edhe nëse SHBA-ja nuk e miraton”, tha Philips për GazetaBlic.
Kujtojmë se, para pak dite kryeministri i Kosovës, Albin Kurti, tha se bashkëpunimi i Kosovës me Shtetet e Bashkuara është i mirë, por se kjo nuk do të thotë që dy vendet “pajtohen absolutisht për gjithçka”.
Kurti tha se Qeveria e tij duhet ta respektojë rregulloren e Bankës Qendrore të Kosovës, që e ndalon përdorimin e dinarit serb, sepse me Kushtetutë dhe ligj e ka për detyrë.
“S’pajtohemi me SHBA-të për çdo gjë” – Nga AKR-ja i reagojnë kryeministrit Kurti
