Bilanci i viktimave nga sulmi terrorist në Bondi Beach ka shkuar në 12 të vdekur, përfshirë edhe njërin nga dy autorët e armatosur, ka bërë të ditur kryeministri i shtetit të New South Wales, Chris Minns, duke theksuar se sulmi ishte “i projektuar për të goditur komunitetin hebre të Sidneit”.
Policia australiane e ka shpallur zyrtarisht ngjarjen si incident terrorist, shkruan BBC.
Komisioneri i Policisë, Mal Lanyon, deklaroi se në vendngjarje ndodheshin mbi 1,000 persona, shumica prej tyre duke festuar festën hebraike të Hanukkah-ut në parkun e Bondi Beach.
Sipas Lanyon, 29 persona janë dërguar në spital, përfshirë edhe një fëmijë. Mes të plagosurve janë edhe dy oficerë policie, të cilët ndodhen në gjendje “shumë serioze, në kufijtë e gjendjes kritike”, dhe po i nënshtrohen ndërhyrjeve kirurgjikale.
Nga dy sulmuesit, njëri ka mbetur i vdekur, ndërsa tjetri ndodhet në gjendje të rëndë në spital, bëri të ditur policia. Autoritetet nuk kanë publikuar ende detaje për identitetin e tyre, ndërsa po hetohet mundësia që një sulmues i tretë të ketë qenë i përfshirë.
Policia konfirmoi gjithashtu se ka gjetur një pajisje shpërthyese të improvizuar (IED) në një automjet të lidhur me sulmuesin e vrarë. Një njësi e specializuar për çmontimin e bombave ndodhet në vendngjarje, në Campbell Parade, Bondi, për të neutralizuar rrezikun.
Dëshmitarë okularë përshkruan skena tmerri, duke raportuar se panë “trupa të shtrirë në tokë”. Ndërkohë, BBC Verify ka konfirmuar pamje që tregojnë të paktën shtatë trupa në tokë gjatë ngjarjes festive.
Pamje filmike tregojnë gjithashtu një burrë që përleshet me njërin nga sulmuesit dhe i merr armën nga dora. Kryeministri Chris Minns i bëri homazhe publike këtij personi, duke e cilësuar veprimin e tij si heroik.
Kryeministri i Australisë, Anthony Albanese, e quajti sulmin një “akt të lig antisemitizmi dhe terrorizmi që ka goditur zemrën e kombit”.
Presidenti i Izraelit, Isaac Herzog, e përshkroi atë si një “sulm jashtëzakonisht mizor ndaj hebrenjve”, ndërsa kryeministri britanik Keir Starmer deklaroi se Mbretëria e Bashkuar “do të qëndrojë gjithmonë përkrah Australisë dhe komunitetit hebre”.
