Lajme

​KE dhe Kosova diskutojnë arsimin, politikat sociale dhe punësimin

02/11/2019 17:58
nga:M H

Përfaqësuesit e Komisionit Evropian dhe autoritetet e Kosovës mbajtën takimin e Nën- Komitetin për Inovacionin, Shoqërinë e Informacionit dhe Politikën Sociale të Marrëveshjes për Stabilizim-Asociim në Bruksel.

Në takim u mbulua një gamë e gjerë temash nga arsimi, politikat sociale dhe punësimi, telekomunikacioni dhe politikat audio-vizuale, trashëgimia kulturore, thuhet në një komunikatë për media.

Diskutimi u mbajt në kuadër të Marrëveshjes së Stabilizim Asociimit (MSA), e cili hyri në fuqi në prill 2016.

Në të gjitha fushat, Komisioni dhe Kosova u pajtuan për rëndësinë e zbatimit të Agjendës përkatëse të Reformave Evropiane dhe prioriteteve të Programit të Reformave Ekonomike, si dhe rekomandimeve nga raporti i fundit të Komisionit për Kosovën dhe rekomandimet e mëhershme të Nën-Komitetit.

Sa i përket arsimit, KE përsëriti nevojën për të prioritizuar sigurimin e cilësisë në të gjitha nivelet, që nga arsimi parashkollor deri tek arsimi i lartë, e cila mund të arrihet duke forcuar organet e sigurimit të cilësisë, si dhe me sigurimin e infrastrukturës së re për arsimim të hershëm.

Komisioni pozitivisht vlerësoi emërimin e Bordit të ri të Agjencisë së Akreditimit përmes konkursit të hapur dhe inkurajon autoritetet që të respektojnë pavarësinë e tyre. Po ashtu, autoritetet e Kosovës u inkurajuan të miratojnë Ligjin e ri për Arsimin e Lartë në Kuvend, në përputhje me rekomandimet e ofruara përmes Instrumentit të Përbashkët BE-Këshilli i Evropës për Ballkanin Perëndimor dhe Turqinë, si dhe Ligjin për arsimin parashkollor.

KE vuri re se autoritetet e Kosovës po ofrojnë numër të kufizuar mësimdhënësish ndihmës për fëmijët me nevoja të veçanta, por duhet të përmirësohet qasja në arsim cilësor dhe për komunitetet pakicë.

Në përgjithësi për arsimin, si dhe për shkencën dhe kërkimin, Komisioni i kërkoi Kosovës që të ofrojë të dhëna të sakta, përfshirë edhe për treguesit e Arsimit dhe Trajnimit 2020.

Lidhur me hulumtimin dhe kërkimin, KE theksoi rëndësinë e kapaciteteve të mira për kërkim dhe inovacion për të rritur konkurrencën, integrimin në Zonën Evropiane të Kërkimit dhe pjesëmarrjen në programet e BE si Horizon 2020 dhe Erasmus +, përfshi edhe emërimin e pikave të kontaktit për secilin program.

Sa i përket mbrojtjes së trashëgimisë kulturore, KE theksoi se Kosova duhet të sigurojë zotimin e vazhdueshëm në Këshillin Zbatues dhe Monitorues dhe punën e tij.

Te punësimi, KE vlerësoi masat aktive të tregut të punës të zbatuara nga Agjencia për Punësim, veçanërisht ato që synojnë rininë dhe gratë.

Palët përsëri ranë dakord se nevojiten përpjekje më të mëdha për të zbatuar Ligjin e punës dhe legjislacionin për shëndetin dhe sigurinë në punë, kryesisht duke synuar inspektimet në sektorët me rrezik të lartë dhe duke rritur numrin e vogël të inspektorëve të punës.

Palët gjithashtu diskutuan lidhur me zbatimin e dialogut social në Kosovë.

Sa i përket shoqërisë së informacionit, Kosova u pajtua të adresojë nevojat e resurseve, veçanërisht në fushën e Sigurisë Kibernetike, duke siguruar staf të mjaftueshëm për Ekipin Kompjuterik për Reagime Emergjente (Computer Emergency Response Team).

Kosova u dakordua të rrisë përpjekjet për të harmonizuar dhe zbatuar Direktivën për Sigurinë e Sistemeve të Rrjetit dhe Informacionit (Security of Network and Information Systems-NIS) si dhe për të transponuar Rregulloren për eIDAS (Shërbimet e Identifikimit Elektronik dhe Besimit për Transaksionet Elektronike në Tregun e Brendshëm – Electronic Identification and Trust Services for Electronic Transactions in the Internal Market).

Lidhur me politikat audio vizuale, në veçanti kalimi në digjitale, Komisioni shprehu keqardhje lidhur me mungesën e progresit dhe inkurajoi Komisionin e Pavarur për Media të gjejë mënyra për të liruar frekuencat gjatë vitit që vjen. Komisioni gjithashtu inkurajoi Kosovën që të gjejë një zgjidhje të qëndrueshme për financimin e transmetuesit publik, në pajtim me acquis të BE-së.

Takimi u bashkë kryesua nga Ministria për Integrime Evropiane dhe Drejtoria e Përgjithshme e Komisionit Evropian për Fqinjësi dhe Negociata të Zgjerimit, me pjesëmarrjen e ekspertëve nga drejtoritë e tjera të përgjithshme dhe ministritë.

Takimet e Komitetit të SA dhe nën-komiteteve bashkë-kryesohen nga Komisioni Evropian dhe Kosova. Çdo takim rezulton në veprime përcjellëse të përcaktuara bashkërisht e të cilat duhet të ndërmerren nga autoritetet e Kosovës.