Opinion

Injorimi i Kushtetutës rrënon tana përpjekjet e deritashme!

03/17/2017 19:20
nga:Petrit Musolli

Kur asht pajtue për themelimin e Listës serbe, bashkimit të subjekteve e përfaqësuesëve serb mbrenda nji liste të përbashkët, besoj ka qenë e kuptueshme se për qëllim kryesor ka pasur që marrëveshjet e arrituna mes përfaqësuesve të Kosovës e Serbisë të munden me u impelmentue e gjetë mbështetjen e komunitetit serb në Kosovë, sidomos të serbëve të veriut.

Siç jem dëshmitarë, para themelimit të kësaj Liste, Qeveria e Serbisë, shpeshherë, ka pasur probleme me përfaqësuesit serb të veriut, të cilët, për interesat e tyne biznisore, kundërshtonin e sfidonin vendimet e Qeverisë së Serbisë në çdo marrëveshje apo dakordim me palën kosovare apo edhe atë ndërkombëtare, lidhun me statusin dhe pozitën e serbëve në insitucionet dhe shoqninë kosovare.

Prandaj, me i evitue këto pengesa që vinin, atëherë, nga përfaqësuesit e serbëve, të veriut në veçanti, asht mendue, ndoshta, si zgjidhja ma e mirë – unifikimi i qëndrimit të tyne mbrenda nji organizimi të ri politik, të kontrolluem nga Beogradi, që ka me i respektue marrëveshjet e arrituna në bisedimet e Brukselit. Kjo asht e vetmja gja që mundet me u pritë nga kjo Listë. Bindje e plotë ndaj Qeverisë së Serbisë dhe vendimeve të saj. Sigurisht, nji realitet që asht tue na kushtue!

03/08/2017 18:53

Që Ushtria mos me përfundue si muralet e Kuvendit!

Por, ideja me ju kundërvue kësaj Liste, tue sulmue të drejtën kushtetuese të serbëve vendor, në të njajtën kohë kur janë tue ba përpjekje të mëdha, sidomos nga partnerët perëndimor, me i integrue serbët mbrenda rendit kushtetues të shtetit të Kosovës, besoj, asht huqje e madhe politike, e me rrezik të lëkundjes së vetë themelit të shtetit!

Kushtetuta asht garancia jonë për serbët dhe, nëse ajo shpërfillet njianshëm, si kem me e demantue, nesër, argumentimin serb se nuk posedojnë kurrfarë garancish kushtetuese në Kosovë?! Sidomos, kur iniciativa të tilla (injoruese ndaj Kushtetutës) vijnë nga vetë Presidenti, përgjegjës për me e mbrojtë kushtetushmëninë e të drejtat kushtetuese!

Mosbindja e Listës serbe, s’mundet me shërbye si arsyetim. Tekefundit, asht Presidenti autoriteti ma i naltë përfaqësues i qytetarëve të Kosovës, edhe serbëve! Ai duhet gjetë formën e mënyrën si me e krijue besimin ndër ta, e kjo s’bahet tue cenue të drejtat e tyne, por tue promovue ato!

Praktika e takimeve, sikur ajo me pjesëtarë të mediave e shoqnisë civile, në Graçanicë, duhet vazhdue, zgjanue e shpeshtue edhe me qytetarë të rëndomtë serb. Duhet argumentue drejtpërdrejt me ta, për tana shqetësimet e keqkuptimet që munden me i pasë. Pamvarësisht pse këto takime, në fillim, munden me qenë të ngarkueme me të kaluemën tonë, në njifarë mënyre edhe duhet kuptue, sepse, pikërisht kjo e kalueme përban frikën ma të madhe të serbëve kosovar, drojen e vazhdueshme nga hakmarrja e shqiptarëve. Nji frikë e drojë që ushqehet vazhdimisht nga Serbia e ‘delegatët’ e saj në Kosovë, por që duhet shue nga ne, si shumicë shqiptare. Mënyra ma e duhun, me i sigurue e inkurajue serbët vendor me besue në ndërtimin e nji shoqnie e shteti të përbashkët, me vlera tjera nga ato të kaluemës, asht me ju fol me gjuhën e Kushtetutës! Kjo gjuhë duhet udhëheqë Presidentin në tana takimet e diskutimet e ardhshme me ta! Jo ankesat ndaj nji organizimi politik, që kushtetushmënisht, asht nën nivelin e tij përfaqësues e të përgjegjësive ndaj qytetarëve të vendit!